Bakhand met ons monde naby die kraantuit les ons ons dors.  Ons week in ‘n salige bad warm water na ‘n sweetdag op die sportveld. Koue druppels spat oor ons lywe aaaa! Min dinge so verfrissend soos ‘n koue stort na ‘n warm dag in die Klein-Karoo-Somerson.

Vir die meeste van ons is H₂O net ‘n doodgewone vloeistof wat ons maklik kry deur bloot ‘n kraan oop te draai. Maar WATER is skaars op ons planeet. Altesaam 97% van die aarde se water is in die oseaan en dus sout. Van die oorblywende 3% vars water is 2,2% deel van die Pole en dus verys.

'n Interessante voorbeeld van die belangrikheid van 'n ekologiese proses hier uit ons eie kontrei is die Lelievlei-reservaat in die inheemse woud naby Karatara. Almal wou graag die George-lelies daar bewaar. Hulle maak toe 'n plan en kamp die George-lelies af binne Lelievlei-reservaat. Maar wat gebeur toe oor 'n dertig, veertig jaar periode? Die George-lelies het totaal en al verdwyn, hulle het net minder en minder geword en uiteindelik was daar omtrent niks oor nie.